Sisimiuni Katersugaasivimmi saqqummersitsinerit
Kalaallit Nunaanni inuit
siulliit. Sisimiut eqqaani asimioqarfinnik Saqqaq kulturiata nalaaneersunik
ukiuni qulini assaanerni nassaat saqqummersitsinermi takuneqarsinnaapput.
Inuit taakku Kalaallit Nunaanni siullersaallutik inuusimapput. Ukiut
4000-ngajaat matuma siorna Sisimiut eqqaanut nunasisimapput.
Tusarnaarusukkuit
V.C.Frederiksenip Katersugaatai. 1902-p 1922-llu akornani sakkut illullu iluani atortut palasip V.C.Frederiksenip katersorsimasai. 1900-kkut aallartilaarneranni ulluinnarni inuuneq pillugu Gert Lyberth-ip qiperugai kusanartut aamma takuneqarsinnaapput.
Oqaluffitoqqap pisatai. Oqaluffitoqqap pisataasa ilaat saqqummersitami takuneqarsinnaapput, soorlu altertavli 1650-p missaaneersoq, taavalu 1790-kkut ingerlanerani qalipagaq kalaallimik qalipanneqarsimasoq.
1900-kkut aallartinneranni kalaallit illorisimasaat assilillugu illu issumik sanaaq sananeqarsimavoq. Misilerarneqarsinnaasunik illu atisanik, illup iluani atortunik, sakkunik pinngussanillu pilersorneqarsimavoq. Silataaniipput qajaq ujarak, tupeq qaannamullu ikaat.
Kalaallit Nunaanni immakkut angallanneq. Saqqummersitami tassani qajaq umiarlu 1700-kkunneersut, taavalu 1900-kkut qiteqqunneranni aalisariutit aalisartut namminneq sanarsimasaat takutinneqarput. Umiatsiat motooritoqai SABB aamma takuneqarsinnaapput.
Poul Madsen-ip Katersugaatai. Eqqumiitsuliat, sanalukkat inuiaallu inooriaasiannik paasissutissat ukiut 50-it ingerlanerini Poul Madsen-imit katersorneqarsimapput. Katersugaasa Sisimiuneersortai maanna Katersugaasivimmit pigineqarput.
